Sport

Þjóðarhöllin á að rísa í janúar 2030

Valur Páll Eiríksson skrifar
Strákarnir okkar í handboltalandsliðinu eiga að spila á heimavelli á HM 2031, í nýrri Þjóðarhöll.
Strákarnir okkar í handboltalandsliðinu eiga að spila á heimavelli á HM 2031, í nýrri Þjóðarhöll. vísir/Vilhelm

Borgarráð Reykjavíkur samþykkti á fundi þess í morgun verksamning milli Þjóðarhallar ehf. og ÍAV hf. um hönnun og byggingu nýrrar Þjóðarhallar fyrir innanhússíþróttir sem á að rísa í Laugardal. Áætluð verlok eru 2030 en Ísland á að vera meðal þjóða sem halda HM í handbolta árið 2031.

Greint er frá samþykkt borgarráðs á vefsíðu Reykjavíkurborgar eftir fund ráðsins í morgun. Umsamið verð fyrir verkið sem Þjóðarhöll ehf og Íslenskir aðalverktakar sinna er 16,8 milljarðar króna.

Ný höll á að taka 8.600 manns í sæti og vera tilbúin til notkunar ekki síðar en 25. Janúar 2030. Laugardalshöll hefur verið á undanþágum frá kröfum alþjóðasambanda í handbolta og körfubolta í þónokkur ár.

Því er ljóst að ný keppnishöll þarf að rísa ætli Ísland að standa við sínar skuldbindingar um að vera ein gestgjafaþjóða á HM 2031 í handbolta karla. Það mót fer fram í janúar það ár, sléttu ári eftir áætluð verklok.

Einn riðill mótsins verður leikinn hér landi en Ísland mun halda HM ásamt Danmörku og Noregi.

Reykjavíkurborg mun greiða 45 prósent verksins, 8,7 milljarða króna, en ríkið 55 prósent, 9,2 milljarða.

Ný þjóðarhöll ÍSÍ Reykjavík HSÍ Handbolti Körfubolti HM karla í handbolta 2031

Mest lesið


Fleiri fréttir

Sjá meira


×

Mest lesið