Fiskur í einhverju formi getur verið góður kostur á jólaborðið. Þótt algengast sé að einhvernskonar kjöt sé haft í hátíðamatinn hér á landi þá eru ekki allir sem leggja sér það til munns af einhverjum ástæðum. Sumir þeirra eru aðdáendur fisks. Svo eru kannski einhverjir orðnir uppgefnir á kjötmetinu á annan í jólum, eftir að hafa borðað yfir sig af því á aðfangadagskvöld og jóladag og þykir gott að skipta yfir í fiskinn. Í það minnsta er kjörið að fríska upp á hlaðborð á annan með því að bera fram fisk í bland við kjötafganga.
Bakaður lax með eplum:
800 gr laxaflök roðlaus/ beinlaus
4 stk græn epli
4 msk. ólífuolía
Salt og pipar
Eplin eru skræld og gróf söxuð. Ólífuolíunni er blandað saman við. Laxinn er skorinn í fjórar 200 gr. steikur, kryddaður með salti og pipar og settur í form. Eplin sett yfir og bakað í 12 mín. Við 180 °c.
Með þessum rétti er gott að bera fram ferskt salat og jógúrtssósu.
Bakaður saltfiskur með tómatmauki:
800 gr. saltfiskflök beinlaus
1 dós tómatmauk
3 stk. tómatar
2 stk. hvítlauksrif
1 tsk. salt
1 tsk. sykur
2 tsk. sæt soyasósa
ólífuolía
svartur pipar
Saltfiskurinn er skorinn í fjórar 200 gr steikur, settur í eldfast mót sem er vel smurt með ólífuolíu. Tómatarnir eru skornir í teninga og steiktir í ólífuolíu í potti ásamt fínt söxuðum hvítlauknum. Tómatmaukinu úr dósinni er blandað saman við. Því næst er saltinu, sykrinum og soyasósunni blandað útí og þetta látið krauma við lágan hita í 15 mínútur.
Saltfiskurinn er látinn í 180°c heitan ofn og bakaður þar í ca 10 mínútur.
Gott er að bera þennan rétt fram með kartöflusalati.
Ath. Þegar saltfiskur er ekki eldaður í vatni þarf að útvatna hann um hálfum sólarhring lengur.
Fiskur í hátíðarbúningi
