Dæmdur fyrir kynferðisbrot

Maður um sjötugt var dæmdur í átta mánaða skilorðsbundið fangelsi fyrir kynferðisbrot gegn dótturdóttur eiginkonu sinnar. Dómurinn var kveðinn upp í Héraðsdómi Reykjaness í gær. Þótti rétt að fresta fullnustu refsingarinnar í þrjú ár haldi maðurinn skilorð vegna veikinda hans, aldurs og iðrunar sem hann sýndi í dómssal. Maðurinn var ákærður fyrir tólf brot gegn stúlkunni, sem er fædd árið 1988, á árunum 2000 til 2004. Ekki þótti fyllilega sannað að maðurinn hefði framið öll brotin enn hann játaði hluta ákærunnar. Hann var sakfelldur fyrir fjóra ákæruliði en sýknaður af tveimur. Við ákvörðun refsingar mannsins var litið til þess að hann misnotaði sér gróflega aðstöðu sína og trúnaðartraust stúlkunnar en hann hafði skyldum að gegna gagnvart henni á heimili sínu. Eins var horft til þess að háttsemi mannsins hefði verið til þess fallin að valda stúlkunni sálarháska og tjóni og að hann ætti sér engar málsbætur. Var manninum gert að greiða stúlkunni 350 þúsund krónur í bætur.