Ræningi enn ófundinn

Tvö rán voru framin á höfuðborgarsvæðinu í gærkvöldi og eru vísbendingar um að sami maður hafi verið á ferð í báðum tilvikum. Hann er ófundinn þrátt fyrir mikla leit. Rétt fyrir klukkan tíu í gærkvöldi hótaði maður með hulið andlit afgreiðslustúlku í söluturni við Borgarholtsbraut í Kópavogi og sprautaði á hana úr meisúðabrúsa, en úði úr þeim hálfblindar fólk. Síðan hrifsaði hann peninga úr peningakassanum og hljóp á brott. Afgreiðslustúlkan var flutt á slysadeild þar sem augu hennar voru hreinsuð og hlaut hún ekki skaða af. Þá kom maður með hulið andlit og meisbrúsa inn í myndbandaleigu við Holtsgötu í Reykjavík um klukkan hálftólf og hótaði afgreiðslumanni þar. Þar kom hann líka höndum yfir peninga og hvarf á braut án þess þó að nota úðann á afgreiðslumanninn. Lögreglumenn í Kópavogi og Reykjavík gerðu umfangsmikla leit að manninum í gærkvöldi og í nótt en án árangurs og hefur lögregla fáar vísbendingar að fara eftir. Stutt er síðan að maður var handtekinn i Reykjavík fyrir fimm rán í sjoppum og verslunum á höfuðborgarsvæðinu og fundust ýmiss konar vopn í bíl hans.