Þrír dæmdir fyrir líkamsárásir

Þrír menn um tvítugt voru í Héraðsdómi Reykjavíkur í dag dæmdir í þriggja mánaða skilorðsbundið fangelsi fyrir líkamsárásir. Mennirnir voru sakfelldir fyrir að ráðast að tveimur mönnum í miðbæ Reykjavíkur með spörkum og höggum. Annar þolendanna nefbrotnaði og marðist illa en hinn hlaut heilahristing og tognaði á kjálka, auk annarra áverka. Árásarmennirnir viðurkenndu að hafa átt í átökum við þolendurna en segja þá hafa átt upptökin. Þótti dómnum sá framburður ótrúverðugur enda stangast hann á við vitnisburð eina hlutlausa vitnisins á staðnum og við framburð þolendanna sem þótti trúverðugur. Vitnisburður tveggja vitna sem sáu árásina þótti ótrúverðugur vegna vinskapar við árásarmennina. Þótti rétt að fresta fullnustu refsingarinnar vegna ungs aldurs mannanna og sakaferils. Þeim var gert að greiða samtals tæplega 350 þúsund krónur í skaðabætur.