Þykir vænt um skóna hennar ömmu

"Það sem er algjörlega ómissandi í fataskápnum mínum er háhælaðir skór sem hún amma mín átti. Ég elska ömmu mína út af lífinu því hún ól mig að miklu leyti upp og því þykir mér rosalega vænt um þessa skó. Við notum líka sama skónúmer. Hún átti þá þegar hún var um þrítugt eða 35 ára en hún er 71 árs í dag," segir Elma, sem hefur aðeins breytt skónum. "Þeir voru skærbleikir en ég spreyjaði þá svarta. Ég sé svolítið eftir því núna og ætti eiginlega að reyna að hreinsa upp svarta litinn og nota þá sem punt. Þeir virðast bara betur farnir svartir. Þetta eru sögulegir skór."

"Þetta eru skór sem ég fer í bara til þess að vera í í tíu mínútur því hællinn er svo hár. Amma eyðilagði einmitt bakið á sér á þessum tíma og gætu skórnir hafa komið þar við sögu. Ég þori eiginlega ekki að nota þá því ég er svo hrædd um að brjóta mig," segir Elma en amma hennar var algjör pæja á sínum tíma. "Fólk átti ekki mikinn pening á þessum tíma en hún var alltaf uppápuntuð í rosalega fínum fötum. Þú ættir að sjá myndirnar af henni síðan þá. Algjör pæja. Hún hefur líka gefið mér fullt af öðrum hlutum sem hún átti í gamla daga eins og nælur og annað skart og mér þykir rosalega vænt um þetta allt saman."