Bætir GSM-kerfi sitt á Vesturlandi

Og Vodafone hefur tekið í notkun GSM-senda í Hvalfjarðargöngum, en um er að ræða lokahluta verkefnis sem staðið hefur yfir frá því í fyrra og felur í sér helmingsfjölgun á sendum á GSM-dreifikerfi Og Vodafone á Vesturlandi. Í tilkynningu frá félaginu segir að markmiðið hafi verið að efla og þétta kerfið á þessu landssvæði, sérstaklega við þjóðveg 1. Þá var einnig lögð áhersla á að bæta samband við sumarbústaðasvæði í Lundareykjadal, Skorradal, Húsafelli og á fleiri stöðum, að sögn Arnar Snorrasonar, framkvæmdastjóra fjarskiptasviðs Og Vodafone. Félagið hefur enn fremur eflt skilyrði á Akranesi og í nágrenni með uppsetningu á tveimur sendum til viðbótar en það stefnir að aukinni markaðshlutdeild á því svæði. Ástæða þess að hafist var handa við þéttingu á GSM-dreifikerfi félagsins á Vesturlandi má rekja til þess að Tal, sem var eitt þriggja fyrirtækja sem sameinaðist undir nafni Og Vodafone, hafði ekki reikisamning við Símann á þessu svæði. Hins vegar hafði Íslandssími, sem sameinaðist einnig undir nafni Og Vodafone, reikisamning við Símann á fyrrnefndu svæði. Örn segir að félagið hafi því ákveðið að segja upp þeim samningi og setja upp eigin senda til þess að bæta þjónustu allra viðskiptavina sinna.