Lögregla leitar innbrotsþjófa

Lögreglan í Reykjavík leitar nú tveggja innbrotsþjófa sem staðnir voru að verki við innbrot í einbýlishús í Seljahverfi um klukkan hálfþrjú í dag. Húsráðandi kom að mönnunum sem tóku til fótanna með það þýfi sem þeir höfðu þegar tekið, skartgripi þar á meðal. Lögreglan hefur nú þegar fundið þýfið sem þjófarnir höfðu falið við ruslatunnu í sömu götu og þeir frömdu innbrotið. Nokkuð góð lýsing á mönnunum er fyrir hendi auk þess sem lögreglan hefur númerið á bílnum sem mennirnir notuðu á flóttanum. Annað innbrot sem framið var í dag er til rannsóknar en brotist var inn í kjallaraíbúð í Gerðunum í Reykjavík og þaðan stolið stafrænum myndavélum.