Játaði að hafa banað hermanni

Scott Ramsey játaði fyrir Héraðsdómi Reykjaness í dag að hafa orðið 33 ára dönskum hermanni að bana á skemmtistaðnum Traffic í Keflavík í nóvember í fyrra. Málið var þingfest í héraðsdómi í dag. Scott Ramsey er ákærður fyrir stórfellda líkamsárás með því að hafa aðfaranótt 13. nóvember í fyrra á skemmtistaðnum Traffic í Keflavík slegið danska hermanninn Flemming Tholstrup í hálsinn hægra megin með þeim afleiðingum að slagæðin rifnaði sem leiddi til heilablæðingar sem dró hann til dauða. Ramsey er skoskur og hefur verið búsettur hérlendis, en hann lék meðal annars knattspyrnu með Grindavík og KR. Hann játaði sök við þingfestingu málsins fyrir héraðsdómi og á hann yfir höfði sér allt að 16 ára fangelsi. Bótakröfur á hendur honum nema tæpum þremur milljónum króna en krafist er tveggja milljóna króna í miskabætur og tæprar milljónar í skaðabætur vegna greiðslu útfararkostnaðar. Ramsey neitaði ekki bótakröfunum heldur fól verjanda sínum að tjá sig um þær við meðferð málsins. Aðalmeðferð fer fram 22. september í haust.