Kanna auglýsingar Ego

Áfengis- og vímuvarnadeild Lýðheilsustofnunnar hyggst kanna hvort auglýsingar þær sem uppi hafa verið á bensínstöðvum Ego síðustu daga brjóti í bága við áfengis- og tóbaksvarnarlög. Á þeim er kynnt tilboð til viðskiptavina stöðvarinnar frá matsölustað í Reykjavík en það tvennt sem er mest áberandi á spjöldunum er stórt glas af Víking bjór og vörumerki viskíframleiðandans Jack Daniel´s. Á henni kemur reyndar fram að um léttöl sé að ræða og að ekki sé um viskí að ræða heldur steikarsósu sem nefnd er eftir drykknum.