Lyfjum stolið í Austurveri

Vopnað rán var framið í Lyfjum og heilsu í Austurveri í fyrrakvöld. Tveir menn gengu inn í apótekið og otuðu sprautunálum að starfsfólki. Þeir ruddust svo inn fyrir afgreiðsluborðið og hrifsuðu með sér eitthvað af lyfjum áður en þeir hlupu á brott. Afbrotamennirnir reyndu ekki að ná peningum úr peningakössum. Ránið gekk hratt yfir en starfsfólki var að vonum brugðið þótt enginn þyrfti áfallahjálp. Guðmundur Örn Guðmundsson, yfirlyfjafræðingur í Lyfjum og heilsu, sagði að fjárhagstjón hefði verið óverulegt Hann var sjálfur ekki á staðnum en var kallaður út til að fara yfir myndbandsupptökur af atburðinum. Lögreglan rannsakar nú málið en þar á bæ töldu menn líklegt að ræningjarnir næðust fljótlega.