Tveir með 300 kíló af mat

Mikið af matvælum fannst í erlendum rútubíl sem kom með Norrænu til Seyðisfjarðar í morgun en aðeins einn ökumaður og einn farþegi voru skráðir þar um borð. Við fyrstu athugun fundust hátt í 300 kíló af ýmsum mat og er verið að leita nánar í bílnum og yfirheyra ferðalangana tvo. Jafnvel þótt mennirnir ætli þetta aðeins til eigin neyslu, eins og það er gjarnan orðað í fíkniefnaheiminum, þá myndi maturinn endast þeim allt sumarleyfið og langt fram á vetur. Hámarksmagn á mann má vera þrjú kíló. Það sem þegar hefur fundist í fórum mannanna tveggja jafngildir því álíka magni og hundrað manna hópur mætti taka með sér.