Góð innkoma hjá Eiði Smára

Eiður Smári Guðjohnson byrjaði á varamannabekknum en átti fína innkomu þegar Chelsea sigraði bandaríska liðið DC United í æfingaleik í Bandaríkjunum í fyrrinótt, 2-1. Eiður kom inn á þegar rúmur hálftími var eftir af leiknum og samkvæmt leikskýrslu á opinberri heimasíðu Chelsea batnaði leikur ensku meistarana til mikilla muna með innkomu Eiðs. Jose Mourinho, stjóri Chelsea, var annars ekki ánægður með frammistöðu sinna manna, en hafa verður í huga að hann stillti upp hálfgerðu B-liði í leiknum. "Við vorum skelfilegir í fyrri hálfleik. Í seinni hálfleik vorum við skárri en samt mjög lélegir," sagði Mourinho. DV komst yfir í leiknum með marki eftir hornspyrnu en Damien Duff jafnaði aðeins fimm mínútum síðar með stórkostlegu marki eftir góðan undirbúning Shaun Wright-Phillips. Það var síðan Hernan Crespo sem skoraði sigurmarkið á 57. mínútu eftir að hafa komið inn á sem varamaður skömmu áður.