Ó­trú­legasta stoðsending tíma­bilsins strax í nóvember

Sá sem gaf sendinguna er leikmaður sem Charles Barkley og Shaq gætu mögulega ekki borið kennsl á í innslaginu „Who he play for?“ sem er reglulega á dagskrá í Inside the NBA. 

Leikmaðurinn heitir Reed Sheppard og var valinn þriðji í nýliðavalinu af Houston Rockets. Hann hefur haft nokkuð hægt um sig í upphafi tímabilsins en í leik Rockets og Portland Trail Blazers síðastliðna nótt átti hann alveg hreint magnaða stoðsendingu þegar hann bjargaði boltanum sem var á leið út af á varnarhelmingi Rockets.

Úr varð ótrúleg stoðsending og má með sanni segja að sjón sé sögu ríkari.

Rockets fóru að lokum með öruggan 116-88 sigur af hólmi en hið unga lið Houston Rockets hefur farið með látum af stað í deildinni, unnið tólf af fyrstu 17 leikjum sínum og níu af síðustu ellefu. 

Rockets og Trail Blazers mætast aftur í nótt og hefst leikurinn klukkan 01:00.