Gerrard vill gleyma Belfast

Steven Gerrard, fyrirliði Liverpool, segir að hann og félagar hans í enska landsliðinu vilji gera allt sem í þeirra valdi stendur til að gleyma óförunum gegn Norður-Írum í Belfast á dögunum og til þess verði þeir að eiga góðan leik gegn Austurríkismönnum um helgina. "Við getum ekki beðið eftir að koma minningunni um þennan leik út úr hugum okkar. Tapið er okkur öllum enn í fersku minni og það er sárt að rifja það upp. Við brugðumst okkur sjálfum, þjóðinni og stuðningsmönnunum í þessum leik og við verðum að bæta fyrir það gegn Austurríki. Ekki aðeins með því að vinna, heldur með því að skemmta áhorfendum," sagði Gerrard.