Kompany hneig niður og var fluttur á sjúkra­hús

Samkvæmt frétt Bild hafði Kompany stýrt æfingu aðalliðs Bayern en ætlaði sér svo að fylgjast með æfingu U23-liðsins þegar hann hneig niður. Þyrla kom með lækni í skyndi á svæðið áður en Kompany var svo fluttur í burtu með sjúkrabíl, samkvæmt þýsku miðlum.

Kompany fékk veirusýkingu í síðustu viku og þegar hann stýrði Bayern í 6-1 sigrinum gegn Leipzig síðasta laugardag varð hann að leggjast niður á sófa í þjálfaraherberginu á Allianz Arena bæði í hálfleik og eftir sigurinn.

Kompany missti svo af æfingu á mánudaginn og á þriðjudag, fyrir leikinn við Arsenal í Meistaradeild Evrópu, auk þess sem aðstoðarmaður hans Aaron Danks sat blaðamannafund fyrir leikinn.

Kompany var hins vegar viðstaddur Arsenal-leikinn og ræddi við fjölmiðla eftir leikinn. 

„Sem þjálfari vill maður alltaf gera allt og sjá um allt. Ég fékk ansi hressilega veirusýkingu í síðustu viku, hlustaði auðvitað ekki á líkamann og svo sagði líkaminn á endanum: Nú skaltu hætta!“ sagði Kompany eftir Arsenal-leikinn.