Englendingar sigruðu Austurríki

Englendingar unnu tilþrifalítinn en mikilvægan sigur á Austurríkismönnum í 6. riðli undankeppni HM í Manchester í dag, en það var Frank Lampard sem skoraði eina mark leiksins úr vítaspyrnu á 25. mínútu leiksins, en enska liðið lék manni færra frá 59. mínútu, eftir að fyrirliðanum David Beckham var vikið af leikvelli. Beckham fékk að líta tvö gul spjöld á tveimur mínútum, hið síðara ansi vafasamt, en hann varð með því fyrsti enski landsliðsmaðurinn til að fá tvö rauð spjöld með liðinu. Beckham mun því missa af leiknum mikilvæga við Pólverja á miðvikudaginn, auk þess sem miðvörðurinn Sol Campbell fór meiddur af velli og verður því væntanlega ekki með í þeim leik. Farseðill enska liðsins á HM í Þýskalandi næsta sumar er þó ekki tryggður enn, því liðið þarf annað hvort að leggja Pólverja á Old Trafford á miðvikudag, eða að vona að Hollendingar vinni Tékka í kvöld.