Og Vodafone margfaldar flutningsgetu GSM notenda:

Og Vodafone hefur tekið í notkun svokallaða EDGE tækni (Enhanced Data Rates for Global Evolution) sem margfaldar flutningsgetu í farsímum viðskiptavina fyrirtækisins. EDGE nær fyrst um sinn til viðskiptavina á höfuðborgarsvæðinu og í Eyjafirði.

Tæknin gerir GSM notendum meðal annars mögulegt að miðla gögnum, ljósmyndum, hreyfimyndum eða vafra á Internetinu á þrisvar til fjórum sinnum meiri hraða en mögulegt hefur verið hingað til. Flutningshraði í EDGE er í raun mismunandi hvað fjarlægð frá sendum varðar og milli einstakra farsíma en tæknin er allt að því 240 Kb/s í kerfi Og Vodafone. Til þess að geta notfært sér EDGE þurfa GSM notendur að hafa farsíma sem styðja slíka tækni.

Og Vodafone hefur að nokkru leyti byggt virðisaukandi þjónustu sína á svonefndri GPRS tækni (General Packet Radio Service), sem býr yfir flutningshraða sem nemur 52 Kb/s. Með tilkomu EDGE margfaldast hins vegar afkastageta í GSM kerfi Og Vodafone gríðarlega og eykur vöruframboð til notenda. Má þar nefna Vodafone Mobile Connect gagnakortið fyrir fartölvunotendur og Vodafone live! sem er fjölbreytt efnisveita fyrir GSM notendur. Vodafone live! gerir notendum kleift að sækja sér myndskeið af mörkum úr ensku úrvalsdeildinni og Meistaradeild Evrópu í knattspyrnu, hágæða tölvuleiki, MP3 hringitóna, fréttir og annars konar afþreyingarefni með meiri hraða og í betri gæðum en áður hefur þekkst.

"Prófanir vegna EDGE hófust í lok sumars en stefnt var að því að taka kerfið í notkun á fjórða ársfjórðungi 2005. Það hefur nú gengið eftir," segir Gestur G. Gestsson framkvæmdastjóri tæknisviðs Og Vodafone.

Hann segir EDGE í raun byltingarkennda nýjung fyrir viðskiptavini. "Hér er um að ræða gríðarlega öfluga tækni sem stuðlar að enn breiðara vöruúrvali hjá Og Vodafone og eflir burðargetu í GSM kerfinu."