Mark Van Persie var löglegt

Arsene Wenger var afar óhress með frammistöðu Rob Styles dómara í tapinu fyrir grönnunum í Chelsea í ensku úrvalsdeildinni í kvöld. Wenger þótti lið sitt vera rænt löglegu marki og sagði að Michael Essien hefði átt að vera rekinn af velli fyrir tæklingu sína á Lauren.

"Það er mjög mikilvægt að skora fyrsta markið í svona leik og að mínu mati tók dómarinn ranga ákvörðun. Markið okkar var fullkomlega löglegt og þessi leikur hefði þróast allt öðruvísi ef markið hefði ekki verið dæmt af okkur. Svo bættu þeir við öðru marki og færðu sig aftar á völlinn, en það er auðvitað afar erfitt að koma til baka í þeirri stöðu," sagði Wenger og var einnig óhress með tæklingu Michael Essien á Lauren.

"Hann hefði átt að fá beint rautt spjald fyrir þetta," sagði Wenger.