Mikill áhugi á bréfum Standard Life

Gengi hlutabréfa í tryggingafyrirtækinu Standard Life hækkaði um 5 prósent í frumútgáfu með bréf í fyrirtækinu í kauphöll Lundúna í Bretlandi í dag.

Tryggingafélagið var stofnað fyrir 80 árum og hefur það fram til þessa verið í eigu viðskiptavina þess, sem eru 2,4 milljónir talsins. Fyrir tveimur árum var hins vegar ákveðið að skrá tryggingafélagið í kauphöll Lundúna.

Standard Life var fyrir útboðið metið á 4,6 milljarða punda, jafnvirði rúmra 642 milljarða íslenskra króna og verður í kjölfar skráningar fimmta stærsta tryggingafélag í Bretlandi.

Að sögn forsvarsmanna Standard Life var geysimikill áhugi á útboðinu. Við upphaf þess stóð gengið í 230 pensum á hlut en hækkaði fljótlega um 15 pens eða 6,5 prósent. Við lok útboðs stóð gengið í 241 pens á hlut og er vonast til að með því hafi tekist að auka hlutafé tryggingafélagsins um 1,1 milljarð punda, jafnvirði rúmra 153 milljarða íslenskra króna.

Verði það raunin má búast við umsnúningi á rekstri félagsins. Hagnaður þess á síðasta ári nam 152 milljónum punda, jafnvirði rúmlega 21 milljarðs króna, en það náðist í kjölfar uppsagnar rúmlega 3000 starfsmanna og endurskipulagningar í rekstri.