Microsoft og ESB í hár saman á ný

Bandaríski hugbúnaðarrisinn Microsoft greindi frá því í síðustu viku að svo gæti farið að dreifing á Windows Vista, nýjasta stýrikerfi fyrirtækisins, drægist í Evrópu vegna tafa af hálfu samkeppnisyfirvalda Evópusambandsins (ESB), en það sakar Microsoft um að hafa misnotað markaðsráðandi stöðu sína.

Að sögn Microsoft sendi fyrirtækið greinargerð um stýrikerfið til framkvæmdastjórnarinnar og er þess beðið hvaða breytingar ESB vill sjá á kerfinu. Verði farið fram á miklar breytingar eru líkur á að stýrikerfið komi síðar út í Evrópu en annars staðar í heiminum.

Í svari ESB segir hins vegar að það sé ekki stjórnarinnar að gefa Microsoft grænt ljós heldur sé það fyrirtækisins að fara að reglum sambandsins.

Framkvæmdastjórn ESB og Microsoft hafa lengi eldað grátt silfur saman. Árið 2004 dæmdu samkeppnisyfirvöld ESB hugbúnaðarrisann til að greiða jafnvirði tæpra 46 milljarða íslenskra króna fyrir að misnota markaðsráðandi stöðu sína. Þegar fyrirtækið hafði ekki framfylgt dómnum í júlí í fyrra voru 26,9 milljarðar króna lagðir ofan á fyrri upphæð.