Spítalinn fær aukið fjármagn

Stjórnvöld hafa ákveðið að hækka framlög til Landspítala - háskólasjúkrahúss um 189 milljónir, að sögn Sivjar Friðleifsdóttur heilbrigðisráðherra. Þar af fara 124,5 milljónir í rekstur spítalans og 65 milljónum verður varið til nýbyggingar barna- og unglingageðdeildar LSH.

Rekstrarspá sem stjórnarnefnd spítalans lét vinna gerir ráð fyrir að halli hans verði allt að tólf hundruð milljónir króna í árslok, eins og Fréttablaðið hefur greint frá. Ráðherra segir stjórnvöld ekki með neinar áætlanir uppi um flutning á verkefnum frá sjúkrahúsinu, eins og Ásta Möller, varaformaður heilbrigðisnefndar Alþingis, setti fram í samtali við blaðið. Hins vegar sé í stöðugri athugun hvaða verkefni sé rétt að hafa innan veggja þess, og hver ekki.

„Landspítali - háskólasjúkrahús er flaggskip í okkar sjúkrahúsþjónustu. Þar eru erfiðustu og viðkvæmustu sjúkdómarnir meðhöndlaðir og þetta er okkar sérgreinasjúkrahús, sem veltir 31,5 milljarði á ári,“ segir Siv. „Við erum nú með til athugunar ásamt fjármálaráðuneytinu halla sjúkrahússins. Þá eru ráðuneytin að líta til fjárlaga næsta árs.“