Stálu fatnaði og tækjabúnaði

Tveir menn voru í gær dæmdir í Héraðsdómi Norðurlands eystra fyrir margvíslega þjófnaði úr tveimur verslunum á Akureyri. Mennirnir voru báðir starfandi í viðkomandi verslunum. Annar þeirra dró sér fatnað úr Sportveri fyrir allverulegar fjárhæðir, auk 10 þúsund króna úr peningakassa verslunarinnar. Hinn tók ófrjálsri hendi tækjabúnað úr Siemens-versluninni fyrir hundruð þúsunda. Mennirnir hlutu skilorðsbundna dóma, annar í þriggja mánaða fangelsi en hinn í fimm mánaða fangelsi, auk greiðslu sakarkostnaðar.