85 heilabilaðir bíða eftir dagvist

Fjögurra til fimm mánaða bið er eftir sjúkdómsgreiningu á minnismóttökunni á Landakoti.

85 bíða eftir dagvist á sérhæfðum deildum. Nítján umsóknir eru óafgreiddar.

Þetta kom fram í máli heilbrigðisráðherra, Sivjar Friðleifsdóttur, við umræður utan dagskrár á Alþingi um þjónustu við heila­bilaða.

Ásta R. Jóhannesdóttir Samfylkingunni var málshefjandi og lýsti því að á Íslandi væru um þrjú þúsund manns með heilabilun á einhverju stigi. Áætlað væri að um tólf þúsund aðstandendur líði vegna sjúkdómsins.

Sagði hún að ástandinu í málefnum heilabilaðra væri mjög ábótavant, fleiri sérhæfð úrræði vantaði tilfinnanlega. Og ekki væri nóg að horfa til stöðunnar eins og hún er í dag. „Vandinn er stór og mun stækka. Heilabiluðum mun fjölga um helming á næstu fimmtán árum.“

Siv Friðleifsdóttir sagði unnið að því að stytta biðtíma eftir sjúkdómsgreiningu á minnismóttökunni og kvað brýnt að fjölga plássum til hvíldarinnlagna. Hún upplýsti líka að dagvistarpláss fyrir minnissjúka væru 129 á landinu öllu og að þrjátíu ný rými fyrir heilabilaða yrðu á nýju hjúkrunarheimili við Suðurlandsbraut.