Óskabyrjun Margrétar

Margrét Lára Viðarsdóttir lék í gær sinn fyrsta leik fyrir þýska liðið Duisburg. Hún skoraði úrslitamarkið í leiknum sem var gegn Þýskalandsmeisturum Potsdam og vannst 3-2. Þetta var leikur í 32-liða úrslitum þýsku bikarkeppninnar en Potsdam vann einmitt bikarinn á síðasta leiktímabili. Margrét var í byrjunarliðinu en var tekin af velli þegar rúmar tíu mínútur voru til leiksloka, mark hennar kom á 50. mínútu. Margrét var fyrir rúmri viku valin besti leikmaður Landsbankadeildar kvenna.