Ekki tekinn alvarlega

Bjarni Ármannsson, forstjóri Glitnis banka og formaður nýrra samtaka fjármálafyrirtækja, segir stofnun sameinaðra samtaka banka og verðbréfafyrirtækja og tryggingafyrirtækja hafa verið til umræðu allt frá árinu 2000. Skriður komst á málið í sumar þegar aðilar samtakanna settust niður og ræddu málin, að hans sögn.

"Að mínu mati hefur það verið vandi fjármálageirans á Íslandi að hann hefur ekki verið tekinn nægilega alvarlega sem atvinnugrein. Á meðan einstök fyrirtæki hafa sótt fram, stækkað og vaxið þá hefur geirinn sem slíkur ekki verið upplifaður sem einn af burðarásum samfélagsins," segir Bjarni og bendir á að eitt af verkefnum samtakanna verði að stuðla að umræðu um fjármálageirann sem einn af grundvallar atvinnuvegum þjóðarinnar og auka skilning almennings á fjármálastarfsemi, auka upplýsingagjöf til almennings og fræðslu um fjármál í skólum.

"Þetta er farvegur fyrir fólk sem er vel menntað og hefur vilja og kraft til að sækja fram. Þetta er farvegur til aukinnar verðmætasköpunar," segir Bjarni.