Peningaskápurinn ...

Dagsbrún aftur á lausu

Uppskipting Dagsbrúnar þýðir að Dagsbrúnarnafnið er á lausu, en ekki var laust við að einhverjir firrtust við þegar félagið tók sér nafnið sem áður prýddi Verkamannafélagið Dagsbrún, en það rann svo með fleirum inn í Eflingu. (Svo er náttúrlega til Ungmennafélagið Dagsbrún í Austur-Landeyjum.)

Þegar Dagsbrúnarnafnið var tekið upp var það af því að stjórnendum félagsins þótti við hæfi að velja sér gott íslenskt nafn í stað „Group“ eða útlensks nafn. Dagbrún merkir byrjun dagsins og átti að tákna samstöðuna innan félagsins. En þeim gildum má svo sem koma á nýju félögin tvö sem til eru orðin, 365 nær yfir alla daga og ekki bara byrjun þeirra og ekki vantar samtöðuna í Teymið.

Fasteignaverð tekur dýfuSamkvæmt tölum frá Fasteignamati ríkisins mældist vísitala íbúðarverðs 306,1 stig í október og hefur lækkað um 2,2 prósent frá fyrri mánuði. Sérbýli hefur lækkað mest, eða um 3,2 prósent, en einnig hefur þarna áhrif 1,7 prósenta lækkun í fjölbýli. „Sem fyrr er flökt í verði sérbýlis mun meiri en í verði fjölbýlis. Vakin er athygli á því að aðeins 80 kaupsamningar voru yfir sérbýli í október og því hefur hver og ein eign mikil áhrif á þróunina milli mánaða meðan 411 kaupsamningar voru um fjölbýli. Þetta skýrir mun á verðflökti milli sérbýlis og fjölbýlis,“ segir greiningardeild Kaupþings og bendir um leið á að velta á húsnæðismarkaði sé að aukast, raunar um 22 prósent milli mánaða. Verðhjöðnun á fasteignamarkaði segir bankinn skýrast af því að stýrivextir Seðlabankans séu teknir að bíta.