Peningaskápurinn ...

Stærstu hluthafarnir í HB Granda týna tölunni hver á fætur öðrum. Nú hafa Vátryggingafélag Íslands, Lífís og Samvinnulífeyrissjóðurinn horfið á braut eftir að félögin seldu hlutabréf sín í þessu stærsta útgerðarfélagi landsins, ef mælt er í kvóta. Það þarf ekki mikið hugmyndaflug til þess að giska á hver kaupandi bréfanna hefur verið en Kaupþing hefur átt í margvíslegum viðskiptum við seljendur.

Kaupþing fór nýverið yfir þrjátíu prósenta hlut í HB Granda og hefur verið einrátt á kauphliðinni um langa hríð. Ýmsar kenningar hafa verið nefndar fyrir þessum mikla áhuga Kaupþingsmanna á Granda. Sumir telja að Kaupþing vilji skipta félaginu upp, selja frá því kvóta og eignir en forvígismenn bankans hafa ekkert gefið upp um áform sín.

Sýn hefur náð sýningarréttinum á enska boltanum af Skjá einum en ljóst má vera að fjárhæðir sem greiddar eru fyrir þessa vinsælu deildarkeppni hafa hækkað gríðarlega frá undirritun síðasta samnings. Talið er líklegt að Sýn borgi 1.300-1.400 milljónir króna fyrir réttinn, sem gildir til ársins 2010, en stjórnendur 365 segjast hafa tryggt sér nokkra styrktaraðila.

Fyrir þremur árum börðust Skjár 1 og og Norðurljós um sýningarréttinn. Sigurður G. Guðjónsson, framkvæmdastjóri Norðurljósa, sagði þá að Norðurljós hefðu boðið 195 milljónir króna fyrir réttinn; 21 prósentum hærri upphæð en þrjú ár áður. Sigurður G. taldi að samkeppnisaðilarnir á Skjánum, sem hrepptu hnossið, hefðu borgað tíu prósentum hærri upphæð; um 220 milljónir króna.