Á höttunum eftir Kelly

Úrvalsdeildarlið West Ham er sagt vera að undirbúa tilboð í írska bakvörðinn Stephen Kelly hjá Tottenham nú í janúar, en samningur hans við Tottenham rennur út í sumar. Talið er víst að Tomas Repka muni fara frá félaginu fljótlega og þá er ljóst að West Ham mun vanta varnarmann til að fylla skarð hans.

Kelly er aðeins 22 ára gamall og stóð sig mjög vel á síðustu leiktíð hjá Tottenham, en hann hefur fá tækifæri fengið í vetur og því vill hann ólmur breyta til. Ekki er þó jafn gefið að Martin Jol og félagar séu tilbúnir að selja Írann unga.