Vill fara til Englands í sumar

Miðjumaðurinn Mahamadou Diarra hjá frönsku meisturunum Lyon hefur gefið það út að hann vilji helst spila í ensku úrvalsdeildinni á næsta ári og þessi skilaboð koma eflaust til með að vekja áhuga Manchester United og Chelsea, sem vitað er að hafa augastað á Malímanninum sterka.

"Úrvalsdeildin er uppáhalds deildin hans og þó ég geti ekkert fullyrt um hvar hann muni spila á næsta ári, veit ég að hann vill helst spila í ensku úrvalsdeildinni. Hann er besti varnartengiliður í Evrópu í dag og allir vita að Chelsea er að leita að manni til að fylla skarð Claude Makelele þegar hann hættir, rétt eins og Manchester United þarf að fylla skarð Roy Keane" sagði umboðsmaður Diarra kokhraustur.