Ég hljóp á mig

Joey Barton, leikmaður Manchester City, hefur nú dregið beiðni sína um að verða seldur frá félaginu til baka og segist vonast til að ná samningum við félagið á næstu dögum. Hann segist jafnframt hafa látið skapið hlaupa með sig í gönur þegar hann fór fram á að verða seldur á dögunum.

"Ég hljóp á mig þegar ég fór fram á að verða seldur, en ég hef líka fengið að heyra það frá stuðningsmönnum liðsins síðan. Ég fullvissa hinsvegar alla um að ég vil vera áfram hjá Manchester City og vona að samningar náist sem fyrst, því ég get ekki beðið eftir að fá að sýna hug minn til félagsins á knattspyrnuvellinum," sagði Barton.