Robben á að fá Óskarsverðlaunin

Jose Reina var ekki ánægður með leikræna tilburði Hollendingsins Arjen Robben í leik Liverpool og Chelsea á sunnudag, en spænski markvörðurinn fékk að líta rauða spjaldið í leiknum eftir að hafa stjakað við Robben, sem lét sig vaða í völlinn með leikrænum tilburðum og fiskaði markvörðinn útaf.

"Þetta var ótrúleg leikræn frammistaða hjá Robben og að mínu mati á hann skilin Óskarsverðlaunin fyrir þessa byltu sína," sagði Reina hneykslaður, en þegar atvikið er skoðað í sjónvarpi sést greinilega að tilburðir Robben eru stórlega ýktir. "Robben er að mínu mati góður leikmaður, en mér finnst rosalega aumt að haga sér svona. Það vita allir að ég er ekki maður sem reynir að meiða andstæðinga mína og ef þetta hefði verið á Anfield, hefði ég aldrei fengið rauða spjaldið," sagði Reina.

"Það var ekki ég sem missti stjórn á mér," var það eina sem Robben hafði um málið að segja.