Fabregas fer ekki fet

Umboðsmaður hins unga Cesc Fabregas hjá Arsenal gerði allt nema að hlæja að fregnum um að Real Madrid hefði áhuga á skjólstæðingi sínum þegar hann var spurður út í málið í dag, en forseti spænska liðsins hefur lýst því yfir í fjölmiðlum að Fabregas sé einmitt maðurinn sem Real vanti. Umboðsmaðurinn segir ekkert í spilunum um að leikmaðurinn yfirgefi Highbury.

"Cesc er þakklátur Arsene Wenger fyrir það tækifæri sem hann hefur fengið hérna og ef hann ætti svo mikið sem að hugsa um að fara frá Arsenal, þyrfti tilboðið að vera mjög gott - ekki bara fyrir hann, heldur fyrir Arsenal líka. Ég hef ekkert heyrt í forseta Real Madrid og því held ég að sé lítið til í þessum vangaveltum þeirra," sagði umboðsmaður miðjumannsins unga.