Ingi­björg orðlaus: „Hversu heppinn er þessi litli strákur?“

Ingibjörg er leikmaður Freiburg í Þýskalandi og segir í færslu á Instagram að það sé erfitt að búa erlendis, í burtu frá fjölskyldu og vinum, á meðgöngunni.

Þess vegna hafi frí heima á Íslandi um síðustu helgi gert henni afar gott og ástin og umhyggjan sem hún fann fyrir hreinlega gert hana orðlausa.

Ingibjörg á sinn þátt í því að Ísland skuli nú vera aðeins einvígi við Portúgal frá því að komast á HM í fyrsta sinn. Vinkonur hennar úr landsliðinu áttu ekki í neinum vandræðum með að slá út Króatíu, samtals 9-0, en eiga mun erfiðara verkefni fyrir höndum í lok nóvember og byrjun desember gegn Portúgölum.

Ingibjörg fór og hitti liðsfélaga sína í landsleikjatörninni og þær glöddu hana með skemmtilegri gjöf, eins konar landsliðssamfellu handa syninum sem væntanlegur er í heiminn. Samfellan var að sjálfsögðu merkt „MAMMA“ með númerinu 6 aftan á en Ingibjörg, sem leikið hefur 86 A-landsleiki, spilar í treyju númer 6.

En það voru ekki bara vinkonurnar úr landsliðinu sem glöddu Ingibjörgu hér á landi því hún fékk líka óvænt steypiboð (e. baby shower) frá fleirum af sínum nánustu.

„Mamma hans er ótrúlega þakklát fyrir þær“

„Orðlaus eftir algjörlega einstaka helgi heima 🥹🩵 Að finna alla ástina sem litla fjölskyldan okkar fékk á Íslandi gaf mér svo mikinn kraft fyrir þennan síðasta (!!) þriðjung meðgöngunnar.

Að búa erlendis á meðgöngunni og hafa ekki fjölskylduna og vinina í kringum mig hefur stundum verið einmanalegt sem gerði þessa helgi enn sérstakari. 🤍

Og hversu heppinn er þessi litli strákur að eiga svona margar sterkar konur sem fyrirmyndir?! Mamma hans er ótrúlega þakklát fyrir þær, fyrir allar frábæru fyrirmyndirnar sem hún á í sínu eigin lífi og fyrir konurnar sem ruddu brautina á undan henni (sjá síðustu myndina),“ skrifaði Ingibjörg. Þar vísaði hún til myndar af landsliðskonunum sem komu Íslandi í fyrsta sinn á stórmót, á EM 2009, en þær voru heiðraðar í hálfleik á leiknum við Króatíu á Laugardalsvelli á þriðjudaginn.