Enn vinnur Miami

Miami Heat er á mikilli sigurgöngu í NBA deildinni þessa dagana og í nótt vann liðið 13. leik sinn af síðustu 14 þegar það skellti Boston 107-104. Sigurinn var þó fjarri því að vera sannfærandi, því Miami lenti á tíma 25 stigum undir í fyrri hálfleiknum. Leikurinn var sýndur beint á NBA TV.

Forskotið sem Miami vann upp í leiknum jafnaði NBA metið í vetur, en áður hafði Chicago náð að vinna um 25 stiga forskot í sigri gegn Charlotte. Fátt benti til þess að Miami næði að vinna upp forskot gestanna frá Boston í nótt, því Dwayne Wade var til að mynda aðeins búinn að skora 5 stig þegar 30 mínútur voru liðnar af leiknum. Hann endaði með 30 stig. Miami hefur verið undir í hálfleik í sjö af síðustu átta leikjum sínum, en hefur unnið þá alla nema einn.

Paul Pierce skoraði 34 stig fyrir Boston og Wally Szczerbiak skoraði 30 stig. Shaquille O´Neal skoraði 26 stig og hirti 11 fráköst fyrir Miam og Jason Williams bætti við 21 stigi.

Seattle lagði undirmannað lið Philadelphia á heimavelli 102-98. Steven Hunter skoraði 20 stig fyrir Philadelphia og Chris Webber skoraði 20 stig og hirti 11 fráköst, en Ray Allen skoraði 26 stig fyrir Seattle.

Golden State lagði Minnesota 105-97. Mike Dunleavy skoraði 24 stig fyrir Golden State og Ike Diogu skoraði 21 stig. Ricky Davis skoraði 29 stig fyrir Minnesota og Kevin Garnett skoraði 20 stig og hirti 17 fráköst. Þetta var sjöunda tap Minnesota í röð og hefur liðið valdið gríðarlegum vonbrigðum í vetur.