Eignuðust stelpu

Hollywood-leikarinn Tom Cruise og unnustu hans, leikkonan Katie Holmes, eignuðust sitt fyrsta barn í gær. Þeim fæddist stúlka sem vóg rúmlega þrjú kíló og í tilkynningu frá skötuhjúunum segir að móður og barni heilsist vel. Þetta er fyrsta barn Holmes en Cruise á fyrir tvö ættleidd börn úr hjónabandi sínu og leikkonunnar Nicole Kidman. Tom Cruise og Katie Holmes felldu hugi saman fyrir um ári síðan og trúlofuðust strax síðastliðið sumar, en frægt er þegar Cruise tjáði ást sína á leikkonunni með miklum ærslagangi í þætti Opruh Winfrey á síðasta ári. Þess má geta að erfingjanum hefur þegar verið gefið nafn, nafnið Súrí, sem á hebresku þýðir "prinsessa".