Óttast að laun lækki

Líklegt er að laun lækki en gerviverktaka og atvinnuleysi aukist vegna niðurfellingar takmarkana á vinnuréttindum erlendra verkamanna hér á landi. Þetta segir stjórn og trúnaðarráð Verkalýðsfélags Húsavíkur sem hefur áhyggjur af því að íbúar átta Austur-Evrópuríkja í ESB fá full atvinnuréttindi á við aðra íbúa EES-svæðisins frá 1. maí næst komandi.

Stjórn félagsins og trúnaðarráð óttast að atvinnurekendur nýti sér breytingarnar til að lækka laun. Þá segir í ályktun þeirra að íslenskur vinnumarkaður sé ekki tilbúinn til að taka við auknu flæði launafólks umnæstu mánaðamót og því hefði verið eðlilegt að fresta frjálsri för verkafólks um nokkur ár.