Fyrsti sigur Víkings í höfn

Nýliðar Víkings unnu í dag sinn fyrsta sigur í Landsbankadeild karla þegar þeir burstuðu Breiðablik 4-1 í uppgjöri nýliðanna í deildinni. Heimamenn höfðu tögl og haldir í leiknum gegn slökum Blikum.

Viktor Bjarki Arnarsson kom heimamönnum á bragðið með marki úr vítaspyrnu á 18. mínútu og lagði upp annað markið fyrir Hörð Bjarnason eftir hálftíma leik. Staðan í leikhléi 2-0 fyrir Víking. Davíð Þór Rúnarsson kom Víkingi í 3-0 á 57. mínútu og það var svo Viktor Bjarki sem innsiglaði sigur heimamanna á 78. mínútu. Marel Baldvinsson minnkaði muninn fyrir Blika á 81. mínútu, en lengra komst Kópavogsliðið ekki og tapaði þar með sínum fyrsta leik í sumar.