Argentínumenn rótburstuðu Serba

Argentínumenn sýndu úr hverju þeir eru gerðir á HM í dag þegar liðið valtaði yfir Serba og Svartfellinga 6-0 í viðureign liðanna í C-riðli og ljóst að ekkert lið verður öfundsvert af því að mæta Suður-Ameríkuliðinu í framhaldinu.

Maxi Rodrigues skoraði tvö mörk fyrir Argentínu og þeir Esteban Cambiasso, Hernan Crespo, Leo Messi og Carlos Tevez skoruðu eitt mark hver. Messi og Tevez eru fulltrúar yngri kynslóðarinnar hjá liðinu og náðu báðir að skora mark í leiknum eftir að hafa komið inn sem varamenn. Þjálfari Argentínu á því sannarlega ekki auðvelt verk fyrir höndum að velja í lið sitt í komandi leikjum.

Mateja Kezman fékk að líta rautt spjald í liði Serba á 64. mínútu fyrir ljóta tveggja fóta tæklingu sem var í raun lýsandi fyrir svekkelsi serbneska liðsins í dag.