Góðar fréttir fyrir lands­liðið og Mikael Egill á upp­leið

Aðeins tólf dagar eru í næsta landsleik Íslands og því góðar fréttir fyrir landsliðið að Mikael Egill sé strax orðinn heill heilsu.

Hann lék allan leikinn á hægri kanti Genoa í 2-1 sigri gegn Lecce á útivelli í dag og þótti standa sig vel.

Milutin Osmajic og Junior Messias komu Genoa í 2-0 á fyrsta hálftíma leiksins en Youssef Maleh minnkaði muninn á 40. mínútu. Heimamenn virtust svo hafa jafnað metin rétt fyrir hálfleik en markið var dæmt af eftir myndbandsskoðun.

Engin mörk voru skoruð í seinni hálfleik og Genoa heldur því áfram flugi sínu eftir erfiða byrjun á tímabilinu. Liðið er komið með 13 stig eftir 10 leiki og situr í 11. sæti. Lecce er í 14. sæti með 9 stig.