Við gerðum sjálfum okkur erfitt fyrir

Karel Bruckner var að vonum vonsvikinn eftir 2-0 tapið gegn Ítölum í dag, en það þýddi að sterkt lið Tékka er á heimleið úr keppninni eftir að hafa byrjað hana með látum. Bruckner sagði liðið sjálft hafa gert sér erfitt fyrir með því að spila manni færri í töpunum tveimur.

"Ég vissi að við ættum við ofurefli að etja í hálfleik þegar við urðum manni færri og marki undir gegn jafn sterku liði og því ítalska. Það var dýrt að missa þessa menn útaf og í leikbönn í keppninni og auðvitað er erfitt að fá stig gegn sterkum liðum ef maður er aðeins með tíu menn á vellinum. Þetta var erfitt verkefni, við gengum í gegn um nokkur vandamál í þessari keppni og nokkur þeirra voru okkur sjálfum að kenna," sagði Bruckner.