1200 öryrkjar missa lífeyrisbæturnar 1. nóvember

Um 1200 öryrkjar munu að líkindum missa allar lífeyrisbætur sínar þann 1. nóvember næstkomandi eftir sérstaka tekjuathugun Greiðslustofu lífeyrissjóða. Bætur 1100 manns til viðbótar skerðast á sama tíma.

Þeir örorkulífeyrisþegar sem þetta á við um fengu sent bréf í morgun frá Greiðslustofu lífeyrissjóðanna þar sem þeim var tilkynnt breytingin. Í bréfinu segir að þetta sé niðurstaða heildarathugunar á tekjum örorkulífeyrisþega þar sem í ljós kom að í sumum tilfellum séu heildartekjur lífeyrisþega umfram þau viðmiðunarmörk sem kveðið sé á um í samþykktum og reglum lífeyrissjóðanna.

Þórir Karl Jónasson er einn þeirra sem fengu hina miður skemmtilegu tilkynningu inn um bréfalúguna í morgun. Hann hefur hingað til verið á 100% örorkulífeyri en eftir breytinguna fær hann aðeins 47%. Það þýðir 42-44 þúsund króna tekjutap á mánuði, að sögn Þóris. Hann

Hrafn Magnússon, framkvæmdastjóri Landssamtaka lífeyrissjóða, segir tekjuathugunina sýna að þeir sem verði fyrir skerðingunni núna, alls u.þ.b. 2300 manns, hafi haft hærri lífeyri en sem nemi þeim tekjumissi sem sjóðfélaginn hafi sannanlega orðið fyrir sökum ororkunnar.

Tekjuathugunin nær til fjórtán lífeyrissjóða. Hrafn segir að þeir sem hafa athugasemdir við þessar breytingar geti komið þeim til viðkomandi lífeyrissjóðs. Þar fyrir utan eigi væntanlega margir rétt á viðbótarbótum frá almannatryggingakerfinu.