Besti sigur Andy Murray á ferlinum

Breski tennisleikarinn Andy Murray náði því sjaldséða afreki í gær að leggja besta spilara heims, Roger Federer, að velli í leik þeirra á Cincinnati Masters-mótinu 7-5 og 6-4. Þetta var aðeins annað tap hins óviðjafnanlega Federer á árinu.

"Menn geta sagt að Federer hafi verið eitthvað frá sínu besta í leik okkar í gær, en þetta er samt stærsti sigur minn á ferlinum. Það er nú einu sinni svo að þó Federer spili aðeins á 70% getu, er hann samt betri en 95% af tennisleikurum heimsins," sagði Bretinn ungi.