United hafnaði Mascherano

Stjórnarformaður Manchester United segir að félagið hafi í tvígang hafnað tilboði um að kaupa leikmanninn Javier Mascherano frá Corinthians í Brasilíu. Mascherano gekk í raðir West Ham ásamt félaga sínum Carlos Tevez í vikunni.

"Okkur var boðið að kaupa hann fyrr í sumar og svo var okkur boðið að fá hann sem lánsmann á dögunum, en við mátum stöðuna þannig að við hefðum ekki not fyrir hann," sagði David Gill, stjórnarformaður United og bætti því við að félagið hefði aldrei haft áhuga á að kaupa framherjann Carlos Tevez eins og talað hafði verið um í allt sumar.