Tap fyrir Finnum

Íslenska landsliðið í körfubolta tapaði fyrir Finnum í kvöld 93-86 í leik liðanna í B-deild Evrópumótsins. Íslenska liðið hafði forystu framan af leik og var 11 stigum yfir í hálfleik, en sterkt lið Finna með Hanno Mottola í fararbroddi, náði að komasti yfir og vann að lokum nokkuð öruggan sigur.

Brenton Birmingham skoraði 20 stig og hirti 6 fráköst fyrir íslenska liðið, Páll Axel Vilbergsson skoraði 17 stig, Hlynur Bæringsson skoraði 13 stig og hirti 15 fráköst og Logi Gunnarsson skoraði einnig 13 stig og Jón Arnór Stefánsson skoraði 9 stig og hitti aðeins úr 2 af 9 skotum sínum í leiknum. Hanno Mottola skoraði 25 stig og hirti 15 fráköst fyrir finnska liðið.