Bankasamruni á Ítalíu

Ítölsku bankarnir Banco Populare Italiana (BPI) og Banco Populare di Verona e Novara hafa ákveðið að sameinast. Með þessu verður til þriðji stærsti banki á Ítalíu en markaðsvirði hans er um 15 milljarða evrur, jafnvirði tæplega 1.300 milljarða íslenskra króna.

Að sögn breska ríkisútvarpsins, BBC, hefur BPI leitað eftir því að sameinast öðrum banka síðan samrunaferli bankans við Banco Antonveneta rann út í sandinn á síðasta ári.

Mario Draghi, seðlabankastjóri Ítalíu, er sagður fylgjandi samruna fjármálastofnana á Ítalíu.

Í sumar varð til stærsti banki Ítalíu með viljayfirlýsingu Banca Intesa, annars stærsta banka Ítalíu, og Sanpaolo-IMI, þriðja stærsta bankans. Hluthafar eiga þó enn eftir að samþykkja samrunann en líklegt þykir að af því verði í desember.