Sigur á Bordeaux gæfi okkur meðbyr í deildinni

Rafa Benitez vonast innilega eftir sigri á franska liðinu Bordeaux í Meistaradeildinni í kvöld og telur að útisigur í kvöld gæfi liði sínu byr undir báða vængi fyrir erfiðan leik við Manchester United í úrvalsdeildinni á sunnudag. Liverpool er aðeins í tíunda sæti í úrvalsdeildinni.

"Við vitum vel að sigur í Meistaradeildinni gæfi okkur góðan byr fyrir næsta leik í úrvalsdeildinni, en sigur í kvöld færir okkur líka einu mikilvægu skrefi nær því að komast áfram upp úr riðlinum," sagði Bentez, sem verður án Steven Gerrard í Frakklandi í kvöld.

"Gerrard er maður sem getur breytt gangi hvaða leiks sem er, svo það er erfitt að vera án hans. Ég held samt að ég hafi úr leikmönnum að ráða sem geta fyllt skarð hans og ég hef líka sagt að ég vilji fara að fá betri frammistöðu frá reyndari leikmönnunum í liðinu. Við erum ekki eina liðið um þessar mundir sem er að finna fyrir álaginu sem er á leikmönnum vegna landsleikjanna um daginn, en eftir að hafa loks fengið þá til baka og fengið tækifæri til að æfa saman, er okkur ekkert að vanbúnaði," sagði Benitez.