Feitari en sú fyrri

Önnur langreyðurin, sem búið er að veiða eftir að hvalveiðar í atvinnuskyni hófust að nýju, kom að landi um miðjan dag. Hún er jafn stór þeirri fyrri en feitari.

Hvalur 9 kom að hvalstöðinni í Hvalfirði um klukkan hálf þrjú í dag með langreyðina sem veiddist í gær í eftirdragi. Óhætt er að segja að hvalurinn hafi trekkt að því við hvalstöðina hafi verið fjöldi fólks þó klukkan hafi verið um þrjú á þriðjudegi og töluvert kalt. Lítið fór fyrir mótmælum andstæðinga hvalveiðanna.

Kristján Loftsson, stjórnarformaður Hvals hf., var ánægður með aflann. Hvalurinn sem veiddist nú væri jafn langur og sá síðasti eða 68 fet, en sjáanlega feitari sem sé mun betra.

Í fréttum NFS í gær greindi sendiráðunautur Sendiráðs Japans frá því að japönsk stjórnvöld hefðu ekki gefið leyfi fyrir innflutningi hvalkjöts en þangað ætlar Krisján að selja kjötið. Hann segir að sér vitandi hafi alltaf verið frjáls innflutningur á hvalkjöti þangað en til Japans hafi Íslendingar ekki haft neitt að bjóða síðan árið 1990 en hvalveiðum hætt hér á landi 1989. Það komi svo í ljós hvernig gangi að selja til Japans.

Kristján biður þá sem hafa áhyggjur af því að hægt verði að koma kjötinu í verð að hætta því og hugsa um eitthvað annað.

Klukkan rúmlega hálf fimm í dag hélt Hvalur 9 aftur út á miðin því þar er enn hvalur þrátt fyrir að langt sé liðið á október. Kristján segir talað um að þetta sé fyrsta vetrarvertíðin í hvalnum. Hann segir að vænta megi að fleiri hvalir veiðist á sömu slóðum og hinir tveir.