Fimm manna fjölskylda í bílslysi

Fimm manna fjölskylda er slösuð, í Noregi, eftir að bíll ók á hana, þar sem hún stóð úti á vegi eftir að hafa lent í árekstri við rútubíl. Þetta gerðist við Andebo í Vestfold.

Rútan stóð kyrr á veginum og ökumaðurinn áttaði sig ekki á að hún var kyrrstæð, og keyrði aftan á hana. Enginn slasaðist við þann árekstur, og fjölskyldan fór út úr bílnum til þess að ræða við ökumann rútunnar.

Meðan þau stóðu við hlið rútunnar kom þriðji bíllinn aðvífandi, og keyrði beint inn í hópinn. Með þeim afleiðingum að fimm slösuðust. Tvö börn úr fjölskyldunni slösuðust svo mikið að þau voru flutt með þyrlu á sjúkrahús.