Skothríð í Danmörku

Danska lögreglan hefur beitt skotvopnum sínum mun oftar á þessu ári, en undanfarin ár. Það sem af er árinu hefur verið hleypt af níutíu skotum.

Mjög strangar reglur gilda um notkun dönsku lögreglunnar á skotvopnum sínum, og er hvert einasta tilfelli tekið til sérstakrar rannsóknar. Skotafjöldinn það sem af er þessu ári er næstum þrefalt á við síðasta ár.

Lögreglan bendir á að þarna séu talin með skot sem séu notuð til þess að aflífa dýr, og í ár hafi verið tvö tilfelli þar sem þurfti að skjóta mörgum skotum. Í annað skiptið var nítján skotum skotið á naut sem olli hættu á hraðbraut. Í annað skipti var níu skotum skotið á bardagahund.